top of page

සුරේන්ද්‍ර වසන්ත පෙරේරා ඝාතන සිද්ධිය: අත්අඩංගුවට ගෙන සිටින සැකකරුවන් කවුද?

Updated: 5 days ago




පසුගිය ජුලි මස 8 වැනිදා අතුරුගිරිය ප්‍රදේශයේ දී ව්‍යාපාරික සුරේන්ද්‍ර වසන්ත පෙරේරා ඇතුළු පුද්ගලයින් දෙදෙනෙකු ඝාතනය කිරීමේ සිද්ධිය සම්බන්ධයෙන් සැකකරුවන් 7 දෙනෙකු අත්අඩංගුවට ගනු ලැබූ බව පොලිසිය පවසයි.

පොලිස් මාධ්‍ය ප්‍රකාශක කාර්යාලය පැවසුවේ බස්නාහිර පළාත් දකුණ අපරාධ කොට්ඨාසයේ නිලධාරින් සහ කොට්ටාව හා අතුරුගිරිය පොලිස් ස්ථානවල නිලධාරින් විසින් එම සැකකරුවන් අත්අඩංගුවට ගෙන ඇති බවයි.

මේ සැකකරුවන් කවුද?

පොලිස් මාධ්‍ය ප්‍රකාශක කාර්යාලය පැවසුවේ අත්අඩංගුවට පත්වූ සැකකරුවන් අවුරුදු 24 සිට 37 දක්වා වූ වයස් කාණ්ඩවල පසුවන පුද්ගලයින් බව ය.

එලෙස අත්අඩංගුවට පත්වූ සැකකරුවන් අතර වෙඩි තැබීම සිදුවූ ස්ථානය වන ටැටූ ෂොප් ආයතනයේ හිමිකරු, වෙඩි තැබීම සඳහා වෙඩික්කරුවන් පැමිණි මෝටර් රථය අම්බලන්ගොඩ සිට අතුරුගිරිය ප්‍රදේශයට රැගෙන පැමිණි සැකකරුවන් දෙදෙනෙකු, එම මෝටර් රථය අපරාධය සිදුකිරීමට පෙර සිය නිවස පිහිටි ඉඩමේ තබාගෙන සිටි සැකකරුවෙකු, අපරාධය සිදු කිරීමෙන් පසු සැකකරුවන්ට පලා යාමට භාවිත කළ වෑන් රථය තබාගෙන සිටි සැකකරුවෙකු ද වන බව පොලිස් මාධ්‍ය ප්‍රකාශක කාර්යාලය පැවසීය.

පොලිසිය භාරයට ගෙන ඇති භාණ්ඩ මොනවා ද?

අපරාධය සිදුකිරීමෙන් පසු සැකකරුවන් පලා ගිය ව්‍යාජ අංක තහඩු යෙදු මෝටර් රථය සහ වෑන් රථය, ව්‍යාපාරික ස්ථානයේ හිමිකරුගේ ජංගම දුරකථනය විමර්ශන නිලධාරින් විසින් සිය භාරයට ගෙන ඇති බව ද පොලිසිය පැවසීය.

මේ අතර පොලිස්පති දේශබන්දු තෙන්නකෝන් (ජුලි 9) මාධ්‍යට පැවසුවේ මෙම සිදුවීමට සම්බන්ධ සැකකරුවන් කිහිප දෙනෙකු අත්අඩංගුවට ගෙන ඇති අතර සෙසු සැකකරුවන් සියලු දෙනා ද ඉදිරි දින කිහිපයේදී අත්අඩංගුවට ගන්නා බව ය.

ව්‍යාපාරික සුරේන්ද්‍ර වසන්ත පෙරේරා ඇතුළු පුද්ගලයින් දෙදෙනකුට මරු කැඳවමින් අතුරුගිරිය, ඔරුවල ප්‍රදේශයේ දී (ජුලි 8 වැනිදා) සිදුවූ වෙඩි තැබීම සම්බන්ධයෙන් පොලිසිය පුද්ගලයින් 5 දෙනෙකුගෙන් ප්‍රකාශ සටහන් කර ගෙන තිබේ.

පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දුව බීබීසී සිංහල වෙත පැවසුවේ, "දැනට මේ ටැටූ ෂොප් එකේ හිමිකරු ඇතුළු පුද්ගලයින් පස් දෙනෙකුගෙන් ප්‍රකාශ සටහන් කරගෙන තිබෙනවා.එම ප්‍රකාශ අනුවත් විමර්ශන නිලධාරින් ඉදිරි විමර්ශන කරනවා." යනුවෙනි.

"දැනට නිරීක්ෂණය වෙන කරුණක් තමයි මේ වෙඩි තැබීම විදෙස් රටක ඉදලා සැලසුම් කරල තියෙනවා කියන එක." පොලිස් මාධ්‍ය ප්‍රකාශකවරයා පැවසීය.

මේ අතර ඝාතනයට ලක්වූ සුරේන්ද්‍ර වසන්ත පෙරේරාගේ බිරිඳ හෝමාගම රෝහලේදී ශල්‍යකර්මයකට ලක් කිරීමෙන් අනතුරුව කළුබෝවිල රෝහලට මාරු කොට යවා ඇති බව රෝහල් බලධාරීන් පැවසීය.

එමෙන්ම කොළඹ ජාතික රෝහලට ඇතුළත් කළ ගායිකා කේ. සුජීවා ගේ පාදයකට වෙඩි වැදීම නිසා සිදුකළ ශල්‍යකර්මයෙන් පසු මේවන විට නේවාසික ප්‍රතිකාර ලබන බවත් ඇයගේ පාදයේ ස්ථාන දෙකකට බරපතල තුවාල සිදුවී ඇති බවත් රෝහලේ ප්‍රකාශිකාවක් බීබීසී සිංහල වෙත පැවසුවාය.

අතුරුගිරියේ වෙඩි තැබීමෙන් මිය ගිය ව්‍යාපාරිකයා කවුද?

අතුරුගිරිය, ඔරුවල ප්‍රදේශයේ දී (ජුලි 8 වැනිදා) සිදුවූ වෙඩිතැබීමකින් ප්‍රසිද්ධ ව්‍යාපාරිකයෙකු වන සුරේන්ද්‍ර වසන්ත හෙවත් 'ක්ලබ් වසන්ත' ඇතුළු තවත් පුද්ගලයෙකු මියගොස් ඇතැයි පොලිසිය පැවසීය.

එම වෙඩි ප්‍රහාරයට ලක්වීමෙන් තවත් පුද්ගලයින් සිව්දෙනෙකු තුවාල ලැබීය.

තුවාල ලැබූවන් අතර ජනප්‍රිය ගායන ශිල්පිනියක් වන කේ. සුජීවා ද වන අතර ඇය කොළඹ ජාතික රෝහලට ඇතුළත් කර තිබේ.

ඒ සම්බන්ධයෙන් කළ විමසීමකදී රෝහල් ප්‍රකාශිකාවක් බීබීසී සිංහල වෙත පැවසුවේ ඇයගේ පාදයේ කලව ප්‍රදේශයට වෙඩි පහරක් එල්ලවී ඇති බව ය.

සිදුවුයේ කුමක් ද?

පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දුව පැවසුවේ ව්‍යාපාරික ස්ථානයක් විවෘත කිරීමේ උත්සවයක් සඳහා පැමිණ සිටි අවස්ථාවේදී මෙම වෙඩි ප්‍රහාරය එල්ල වී ඇති බව ය.

"අතුරුගිරිය හංදියේ ඉදල ඔරුවල ප්‍රදේශයට යන මාර්ගයේදී තමයි මේ සිදුවීම් වෙලා තියෙන්නේ."

"ටැටූ ෂොප් එකක් විවෘත කිරීමට සහභාගි වෙලා ඉන්න අවස්ථාවේදී තමයි කාර් රථයකින් ආපු වෙඩික්කරුවන් මේ අපරාධය සිද්ධ කරලා තිබෙනවා කියලා දැනට මුලික තොරතුරු ලැබිලා තියෙන්නේ."

"සිදුවීමෙන් තුවාල ලබලා තියෙනවා 06 දෙනෙක්. ඔවුන් අතර ව්‍යාපාරිකයෙකු වන සුරේන්ද්‍ර වසන්ත , ගායිකාවක් වන කේ.සුජීවා ඉන්නවා කියලා දැනුම් දීලා තිබෙනවා."

"ඔවුන්ව හෝමාගම සහ කොළඹ ජාතික රෝහල් වලට ඇතුළත් කරලා තියෙනවා."

"දැනට තිබෙන තොරතුරු අනුව ව්‍යාපාරිකයෙක් වන සුරේන්ද්‍ර වසන්ත මියගිහින් තිබෙනවා."

"සිද්ධිය ගැන මුලික විමර්ශන සිදුකරනවා." පොලිස් මාධ්‍ය ප්‍රකාශකවරයා පැවසුවේය.

3 views0 comments

Comments


vishvavahini-logo_high_res-005-3.png
  • Facebook
  • Youtube
bottom of page